கலாமின் சலாம்....என்னவொரு வில்லத்தனம்

விசுக்கோத்து விவேக்குடன் சேர்ந்து வில்லத்தனம் பண்ணக் கிளம்பியிருக்கின்றார் முன்னைநாள் ஜனாதிபதி. அறிவுஜீவித்தன குல்லா மட்டும் போதாது அரசியல் பண்ண என்பதை எண்ணி ஐந்தே வருடங்களில் அறிந்து கொண்டவர். அல்லது அறிய வைக்கப்பட்டு வெளியேற்றப்பட்டவர்.

இப்போது பாடசாலைகளுக்குப் போய் பிஞ்சுக்குழந்தைகளின் மனதில் ஆசைகளை வளரவிட்டு பின்னால் அவர்களின் எல்லா அவஸ்தைகளுக்கும் முழுக்காரணமாகப் போகின்றவர். வேறு எப்படிச் சொல்வது?

மாணவர்கள் ஒரு லட்சியத்தை ஏற்படுத்திக்கொண்டு அதற்காக கடுமையாக உழைத்தால் நிச்சயம் குறிக்கோளை அடைய முடியும்

மாணவர்களால் அது முடியாததல்ல. படிக்கும் மாணவர்கள் எல்லோரும் ஏதோ ஒரு குறிக்கோளை இலட்சியத்தை வைத்துக் கொண்டு தான் படிக்கின்றார்கள். ஆனாலும் என்ன நடக்கின்றது. படித்து எவ்வளவு தான் நல்ல மார்க்குகள் பெற்றாலும் பணபலமில்லாதவர்களின் படிப்பு பாதியிலேயே கருகிப் போகின்றது. இதனால் என்ன நடக்கின்றது..ஒரு மாணவனின் 10,15 வருடங்கள் அடைய முடியாத குறிக்கோளுக்காக அழிந்து போகின்றது. இந்த அடிப்படை விடயத்தைக்கூட புரிந்து கொள்ளாத ..மாற்ற முயலாத ... இதை இன்னும் ஊக்குவிக்கும் இவரா சிந்தனாவாதி?

கிராமப்புறம்-நகர்ப்புறம் என்ற பாகுபாடு இல்லாத இந்தியாவை, அனைவருக்கும் தரமான கல்வி, மருத்துவ வசதி கிடைக்கக்கூடிய இந்தியாவை, லஞ்சமும், ஊழலும் இல்லாத இந்தியாவை, வெளிப்படையான அரசு நிர்வாகம் நடக்கக்கூடிய இந்தியாவை

கனவு ..கனவு..வெறுங்கனவு மட்டுமே... நனவுலகில் வாழப்பயப்படும் கோழை மனது. ஜனாதிபதியாக இருந்தபோது எதை இவரால் சாதிக்க முடிந்தது? ஏன் அவ்வாறு முடியவில்லை என்றாவது சிந்தித்தாரா?

எங்கள் விசுக்கோத்து விவேக் கலாமைப் பற்றி ஏதோ அச்சுப்பிச்சுவென்று உளறி வைத்து விட்டது. அதைக்குழந்தைகள் பிடித்து விட்டது. அதனால் விவேக்கிற்குக் கிடைத்தது "பத்மசிறீ" பட்டம்.

எந்தக் குழந்தையைக் கேட்டாலும் "அப்துல் கலாம் ஆக வேண்டும்" என்று தான் சொல்லுகின்றது. ஆகி... பாடசாலைகள் தோறும் கவைக்குதவாத கனவுகளைப் பற்றிச் சொல்ல வேண்டுமா?

இலஞ்சம் இல்லாத இந்தியா? அரசியல்வாதிகளின் இரண்டு கைகளையும் வெட்டி விடவேண்டும் ."பை" இல்லாத சட்டை போட உத்தரவிடவேண்டும். இவரால் செய்ய முடியுமா?

நாட்டில் நடக்கும் அட்டூழியங்களை எதிர்த்து எப்போதாவது குரல் கொடுத்திருக்கின்றாரா? அறிவுஜீவித்தனம் மட்டும் வாழ்க்கையைப் புரிந்து கொள்ளப்போதாது. மனிதாபிமானமும் கலந்து வேண்டும்.

அஹிம்சை இருந்த இடத்தில் அணுகுண்டினைத் திணித்தவரிடம் ..எதை எதிர்பார்க்க முடியும்.

தீவிரவாதம் இல்லாத இந்தியாவை காண வேண்டும் என்று கனவு காண்கிறேன்

உள்நாட்டில் தீவிரவாதம் இல்லாத இந்தியா..வெளிநாடுகளில் தீவிரவாதம் செய்யும் அடாவடி இந்தியா..இது எப்படியிருக்கின்றது.

அற்புதமான கனவு... "கத்தியெடுத்தவனுக்கு ..கத்தியால்தான் சாவு.." எப்போது இந்தச் சின்ன மூளைக்குள் வல்லரசுக் கனவு வந்ததோ அப்போதே தீவிரவாதம் தாக்குவதற்கு "கதவைத்"திறந்து விட்டாயிற்று.

அந்த இந்தியாவின் கனவு தான் இன்று 50 ஆயிரம் ஈழத்தமிழரை மேட் இன் இண்டியா குண்டுகளால் கொன்று போட்டபோது இந்த அறிவுஜீவியின் மனதில் ஒரு சொட்டு இரக்க நீர் கூட சுரக்கவில்லை.